Húrra?

Voru greyið mennirnir ekki bara að reyna að verja sig gegn þessum útlenda óaldarlýð sem virðist vera að leggja undir sig miðborgina, ef eitthvað er að marka umfjöllun fjölmiðla síðustu misseri. Er þetta mál ekki bara jákvæð vísbending um að við Íslendingar getum enn tekið til hendinni að sönnum víkingasið, skýr skilaboð til allra þessara Pólverja og Litháa sem sögur segja að gangi nauðgandi og berjandi um bæinn?

Þetta mál er allt hið ógeðfelldasta og refsingin vart meira en hálfgert ,,skamm" þrátt fyrir að um þyngingu á dómi héraðsdóms sé að ræða..maðurinn er laminn í klessu á Laugarveginum fyrir það eitt að tala ekki íslensku...hvert er næsta skref?

Hæstiréttur þyngir dóma vegna líkamsárásar

Kosmískt jafnvægi?

Þurfti Chelsea ekki sárlega á þessu að halda? Það hefur nú ekki vantað gjafirnar á þeim bænum undanfarið...ekki grýtti Múri skjánum í aðstoðardómarann þegar hans menn fengu víti á silfurfati á Anfield um daginn!

Annars þarf nú að fara að taka til í dómaramálunum og aga mannskapinn, beggja megin borðsins. Þó svo að frammistaða dómaranna í ensku deildinni sé oft hreinlega hlægileg þá er algerlega óþolandi að menn séu sífellt vælandi í þeim, bætir ekki ástandið. Þarf einnig að taka harðar á leikaraskap, sem er náttúrulega ekkert annað en svindl...sumir dómarar eru nógu djarfir til að spjalda aðrir ekki...verður að vera samræmi í þessu! Sama með rauðu spjöldin, sumir dómarar virðast hreinlega ekki gefa rautt meðan aðrir eru stífir og fara miskunnarlaust eftir bókinni...ekki beint sanngjarnt!

Það jákvæða við þetta allt saman er að nú loksins verður ef til vill alvöru barátta fjögurra liða um dolluna!

Löglegt mark dæmt af Chelsea

Glæsileg frammistaða!

Hef ekki séð aðra eins frammistöðu síðan ég fór á leik í kvennaboltanum (góð knattspyrna, hörmulega slök dómgæsla) fyrr í sumar....hvernig hægt er að bjóða upp á fúskandi utandeildardómara í svona toppslag tveggja frábærra liða er algerlega óskiljanlegt..virðingarleysi! Lágmarkið að menn séu með hálfa sjón og kunni helstu leik- og vinnureglur, til dæmis í tengslum við áminningar...Reyndar tæplega hægt að kenna dómaranum um úrslitin, við gátum alveg, og áttum auðvitað, að drepa þennan leik sjálfir í fyrri hálfleik..þrátt fyrir það, verulega fúlt að leikurinn skuli vera eyðilagður af flautufífli sem á alls ekkert erindi á þetta stig..svipað eins og ég myndi mæta og spila á trommurnar hjá Sigurrós á hljómleikum...ekki boðlegt!

 En deildin verður í það minnsta hörkuspennandi þetta árið...besta Liverpoollið sem ég hef séð í mjög mjög langan tíma...og nýr Messías í treyju nr. 9, glæsileg frammistaða þar!..verður ekki betra! Er kannski kominn tími til að FA fari að fjárfesta í dómurum í takt við fjárfestingar liðanna? Þetta gengur ekki lengur!

Liverpool og Chelsea skildu jöfn, 1:1

Ást eftir pöntun?

Ég verð að viðurkenna það að aldrei datt mér í hug að þetta samband myndi endast..eftir allan sirkusinn sem á undan fór!...hvað þá enda með barneignum og hjónabandssælu.

Er ekki við hæfi að gefa hjónakornunum gott lófatak á ameríska vísu og óska þeim til hamingju...það skyldi þó aldrei verða að þetta ævintýri endi eins og þessi gömlu góðu..."eignuðust þau börn og buru og lifðu hamingjusöm til æviloka"?

Þessi dramatíska og sykursæta ástarsaga vekur hins vegar upp vandræðalegar vangaveltur fyrir okkur sveitarómantíkerana sem viljum hafa þetta allt tilviljanakennt og náttúrulegt...er hægt að finna ástina á fyrirfram ákveðinn og þaulskipulagðan hátt?? Getur fólk orðið ástfangið eftir pöntun? Svo virðist vera!

Fyrsta Bachelorette barnið fætt

Frelsishetja sunnanverðrar Afríku

Það fynnast vart merkilegri menn í afrískum stjórnmálum en herra Mugabe. Ferill hans nær aftur til 8. áratugar síðustu aldar þegar mörg ríkustu lönd Afríku voru enn undir járnhæl nýlendustefnu Englendinga og lýðræði var nánast óþekkt fyrirbæri í sunnanverðri Afríku. Eftir að hafa leitt frelsisher Zimbabwe (landið hét þá Rhodesia, hógvært minnismerki um nýlendufrömuðinn Cecil Rhodes) til frekar friðsamlegs sigurs gegn ensku nýlendustjórninni varð Mugabe holdgerfingur hinnar afrísku frelsisbaráttu, og er það enn, 30 árum síðar! Það er ótrúlega athyglisvert að ræða Mugabe við Afríkubúa, einkum Zimbabwebúa, þar sem hann er svo dáður og elskaður þrátt fyrir þann harmleik sem hann hefur staðið fyrir síðustu 10 ár eða svo. Ekki má gleyma því að til að byrja með var Mugabe mjög hófsamur miðað við sína samtíðarmenn og reyndi að finna friðsama lausn á nýlendudeilunni við Englendinga, reyndar náðist sú lausn en Tony Blair ákvað að virða ekki þá samninga sem fráfarandi stjórn hafði gert. Í kjölfarið af því hafa England og Zimbabwe eldað grátt silfur og hafa ensk stjórnvöld ekki hikað við að beita áhrifum sínum til að reyna að koma Mugabe frá. Sú viðleitni hefur haft þau áhrifa að kallinn hefur orðið þrjóskari, harðari og ofsóknarbrjálaðri með hverju árinu og nú er svo komið að Zimbawe er orðið að hálf fasísku lögregluríki þar sem þeir einu sem hafa til hnífs og skeiðar eru herinn og flokksbræður Mugabe. Þrátt fyrir allt þetta er maðurinn enn mjög virtur og jafnvel vinsæll, bæði heima fyrir og í nágrannalöndunum. Meira að segja Mutharika Bingu, forseti Malawi, sem var háttsettur embættismaður innan UN og vel liðin af Vesturlöndum hefur líst því yfir að Mugabe sé eitt af hans helstu átrúnaðargoðum auk þess sem hann gerði sér lítið fyrir og nefndi nýlega nýja hraðbraut "Mugabe highway" við litla hrifningu umheimsins.

Því er það svo að þrátt fyrir að meira að segja heimamenn viðurkenni nú að elliær kallinn sé orðinn ruglaður og beri að mestu leyti ábyrgð á þeim hörmungum sem dynja á Zimbabwe nú, þá er virðingin fyrir honum enn slík að sá eini sem getur haft af honum völdin er maðurinn með ljáinn...það er því bara að vona að uppskerutíminn nálgist á þeim bæ!

Stefnt að þjóðnýtingu í Simbabve

Loksins loksins loksins!!!

Lengi hef ég beðið eftir því að sjá Liverpool kaupa alvöru snilling, frekar svekkjandi að þurfa að horfa á Chelsky og ManU lokka til sín hvert goðið á fætur öðru fyrir milljarða meðan meðaljóninn Cisse er það besta sem Liverpool hefur haft efni á hingað til! Torres er vel að heiðrinum kominn og verður vonandi lykilmaður í meistaraliði Liverpool á næstu leiktíð!

Torres stóðst læknisskoðun hjá Liverpool

Algjör snillingur!

Fyrir þá sem einhvern tíma efuðust (og ég var einn af þeim)...Paris er einn af helstu snillingum vorra tíma! Jafnvel hugmyndaríkustu skáldsagnahöfundar gætu verið stolltir af þeim söguþræði sem bimbógyðjan umdeilda hefur spunnið, hvað þá að ná að koma allri þessari dramatík og spennu inn í sitt daglega líf! Nútíminn er trunta, en enginn hefur hangið á baki þeirrar trylltu skepnu lengur og glæsilegar en hin gljáfægða Paris...og nú er hún kominn til Larry King! Það er ekki annað hægt en að klappa dömunni lof í lófa!

Larry King fær fyrsta viðtalið

Flokkur allra lands[karl]manna?

Það er greinilega fleira en kosningakerfið sem kemur manni í opna skjöldu í íslenskri pólitík! Ég verð að viðurkenna að það kom mér ánægjulega á óvart að íhaldsbandalagið rótgróna skyldi brotna með svo dramatískum hætti og flokkur allra landsmanna taka sér Samfylkinguna til slagtogs í nýrri og spennandi ”frjálshyggjustjórn”. Það sem kom mér hins vegar enn meira á óvart var samsetning títtnefndrar Ríkisstjórnar, einkum og sér í lagi hvað varðar hlut kvenna.

Á meðan Ingibjörg er sjálfri sér samkvæm og stillir upp nokkuð sannfærandi hópi ráðherra þar sem konur og karlar sitja við sama borð – og endurspegla þannig samfélagið sjálft - heldur Geir uppi gömlum hefðum og setur fram klassískan gæðingalista, þar sem aðeins ein kona, varaformaður flokksins, kemst upp á dekk. Réttlætingin virðist vera einfaldlega eitthvað á þessa leið ”svona er þetta bara”. Auðvitað er ekki hægt að skipa í ráðherrastóla eingöngu eftir kynferði, pólitískur styrkur og persónulegir hæfileikar þurfa vissulega að vera í öndvegi, en hvernig getur flokkur sem fyrir kosningar selur sig sem nútímalegan jafnréttisflokk og otar mjög frambærilegu kvenfólki í fremstu röð á kosningarglansmyndum leyft sér að skipa ríkisstjórn með aðeins einni konu?

Skilaboðin eru einföld og verulega merkileg, það er aðeins ein kona í Sjálfstæðisflokknum nógu sterk pólitískt (þar sem það liggur ljóst fyrir að margar þeirra eru rúmlega fullfærar faglega) til að fá ráðherrastól! Skilaboðin verða enn merkilegri sé litið til kosninganna sjálfra. Þegar listar Sjálfstæðismanna í kjördæmunum sex eru skoðaðir (http://www.xd.is/xd/2007/kjordaemi/) kemur í ljós að þegar litið er yfir hópinn (tíu efstu sætin) voru konur í meirihluta. Vissulega vekur athygli að aðeins ein kona skyldi ná að skipa 1. sæti lista, auk þess að konur skipuðu yfirleitt neðri sæti listanna (aðeins 7 konur náðu að vera meðal efstu fjögurra) en þrátt fyrir það voru sjálfstæðiskonur áberandi í baráttunni og þeim skartað víða á glansmyndaáróðri fyrir kosningar. Þær skiluðu líka sínu og í raun má færa rök fyrir því að sá óumdeildi sigur sem Sjálfstæðisflokkurinn vann hafi verið sigur kvenna! Í Suðvesturkjördæmi, þar sem flokkurinn vann sinn stærsta sigur og náði inn sex þingmönnum, voru það konur sem leiddu listann og skipuðu bæði baráttusætin. Svipaða sögu sögu má segja frá Norðausturkjördæmi þar sem konur hrepptu tvö af þremur þingsætum flokksins með góðum varnarsigri. Á sama tíma, til samanburðar, gekk fremur illa í Norðvesturkjördæmi þar sem þrjú efstu sætin voru skipuð gömlum gæðingum.Það hlýtur því að hafa verið hálfgert náðarhögg fyrir sjálfstæðiskonur að fá ráðherralista Geirs eins og kalda vatnsgusu í andlitið, eða hvað? Ráðherrastólar hafa tilhneigingu til að endurspegla valdahlutföll innan flokka og ef svo er þá er hlutur kvenna innan Sjálfstæðisflokksins vægast sagt rýr. Nú flokkast ég sem fremur hófsamur femínisti en verð þó að segja að ég á erfitt með að taka glansyfirlýsingar Sjálfstæðismanna um jafnrétti og breiðfylkingu allra þjóðfélagshópa alvarlega. Þrátt fyrir að skipt hafi verið í brúnni og flokkurinn hafi vissulega mun fágaðra og nútímalegra yfirbragð virðist gamla kallaklíkan hafa haldið sínu. Meira að segja andlit flokksins út á við, kvenhetjan sjálf Þorgerður Katrín, virðist ætla að kyngja og brosa sem þægri heimasætu sæmir...svona er þetta bara. Getur verið að allar þessar frábæru konur sem voru svo áberandi fyrir kosningar hafi aðeins verið með upp á punt? Láta metnaðarfullar og sjálfstæðar nútímakonur bjóða sér slíkt? Ég ætla að leyfa mér að vona ekki!       

Eurotrash!?

Þessi "frétt" hefði ekki komið mér á óvart EF í dag væri 1. apríl. En svo er víst ekki...VÁ! Allur ferill Sylvíu Nætur er vissulega með ólíkindum og með hliðsjón af því mikla útrásarhugarfari sem nú ríkir á landinu þarf það svo sem ekki að koma á óvart að svona "hæfileikaríkir" listamenn leiti út fyrir landsteinana að stærri og nútímalegri mörkuðum.  Það óvænta er frekar að þetta skuli vera að takast...reyndar mun TV4 í Svíþjóð seint geta talist til heimsfrægðar..en samt merkilegur árangur fyrir svona sjónvarpsefni...fyrst hin málefnalega og hógværa Sylvia Night getur "meika'ða" hver veit, kannski eiga einhverjar þýskar rásir eftir að kaupa nokkrar seríur með Strákunum?!

Silvía Nótt í Svíþjóð

Í svörtum fötum!

Enn á ný hefur hin glæsta lýðræðismenning okkar Íslendinga borið ríkulegan ávöxt! Stöðugleikinn heldur velli og íhaldið rís óvænt upp frá dauðum rétt eins og vondi kallinn í æsispennandi hryllingsmynd. Ekki nóg með það, hið íslenska kjörkerfi stendur fyrir sínu sem aldrei fyrr og heldur frambjóðendum, og þjóðinni allri, á heljarþröm þar til hvert einasta afdalaatkvæði hefur verið talið að minnsta kosti tvisvar sinnum!

Að vísu er spennunni spillt lítið eitt þar sem aldrei leikur minnsti vafi á því hvaða flokkur verður sá stærsti, þar nær stöðugleikinn hámarki þó vissulega geti verið spennandi að sjá hvort fylgið sveiflist um meira en eitt prósentustig frá síðustu kosningum. Ekki nema von að þessar kosningar þyki þær mest spennandi í manna minnum!

En örvæntið ei! Sú spenna sem tapast við það að frá upphafi liggi fyrir hver verði sigurvegarinn er bætt upp með algerri óvissu um það hvað verði um alla litlu flokkana sem bítast hatrammlega um þau fáu atkvæði sem eftir eru. Þar er barist á banaspjótum til síðasta atkvæðis þar sem svo skemmtilega vill til að síðbúinn kjörkassi frá afdalahreppi á Vestfjörðum getur gerbreytt niðurstöðum á landsvísu, brellumeistarar Hollywood hefðu ekki getað fundið upp dramatískara kerfi!

Það skemmtilegasta af öllu er svo að niðurstaðan lýtur eigin lögmálum sem eru svo flókin að enginn virðist í raun skilja þau, óvissan er alger og spennan í algleymingi! Nokkur dæmi um (ó)væntar uppákomur:

atkvæði í einu kjördæmi hefur tvöfallt vægi á við atkvæði í því næsta

listi getur tapað fylgi en bætt við sig þingmanni

listi getur aukið fylgi sitt en tapað þingmanni

uppbótarþingmenn koma og fara með dularfullum og óvæntum hætti

stjórnin stendur og fellur að sama skapi með álíka ófyrirsjáanlegum hætti

hægt er að ná hreinum þingmeirihluta með innan við 48% greiddra atkvæða

flokkur sem fær 6000 atkvæði á landsvísu fær engan þingmann kjörinn meðan aðrir flokkar fá að meðaltali einn þingmann fyrir hver 3000 atkvæði

Þrátt fyrir alla þessa spennu og skemmtun eru alltaf til neikvæðir nöldurseggir sem kvarta og kveina og eru aldrei ánægðir. Þessir menn kunna ekki að taka tapi og væla endalaust undan ólýðræðislegu kosningakerfi og reglugerðum, ég er einn af þeim!

Þjóðin hefur tjáð sig, lýðræðið hefur blómstrað og leggst nú í dvala þar til í febrúar 2011! Bíð bara "spenntur" eftir að Sjálfstæðismenn láti meintar útstrikanir sem vind um eyru þjóta og haldi galvaskir áfram hefðbundnu stjórnarsamstarfi...

í dag er sorgardagur, í dag klæðist ég svörtu!