Verðugur er verkamaðurinn launa sinna!

Alltaf æsispennandi fyrir sauðsvartan almúgamann að fylgjast með ríkidæmi hinnar nýju kynslóðar íslenskra víkinga vaxa með ógnarhraða í útgarði. Björgólfur ríki kominn í hóp stóru strákanna, þegar búinn að skjóta kempum á borð við Donald Trump og Spielberg ref fyrir rass og nálgast óðum George Lucas! Hann á meira að segja úrvalsdeildarlið! Væri reyndar ákveðið skipbrot ef West Ham myndi nú falla niður í aðra deild, ekki það að 263 milljarðar dugi ekki til að kaupa nýtt lið!

Það sem ég skil ekki er þetta: óskaplega hlýtur maðurinn að vinna mikið! Gróðinn litlir 65 milljarðar (já, 65.000 milljónir!! 180 milljónir á dag!) á síðasta ári! Vantar ekki yfirtíðina á þeim bænum! Hefur samt tíma til að mæta á Upton Park! Þarna fer greinilega garpur sem gefur Gunnari á Hlíðarenda ekkert eftir, þótt hanni stökkvi ef til vill ekki hæð sína í fullum herklæðum!

Athugasemdir

[Bjarki (IP-tala skráð) 30.4.2007 kl. 13:55]

Þetta er bara gamaldags hugsunarháttur. Þetta er ekki spurning um að vinna sjálfur heldur láta peningana vinna fyrir sig ókeypis... allan sólahringinn allt árið um kring ;)

Þú ert samt aðeins að rugla þeim feðgum saman, það var Björgólfur eldri sem fór í West Ham ævintýri.

[Leifur Ingi Vilmundarson, 30.4.2007 kl. 17:39]

Þetta er reyndar rétt hjá þér, ruglaðist því hann (sonurinn) var á Upton Park um daginn! Þetta þýðir náttúrulega bara eitt, maðurinn verður nú að eiga úrvalsdeildarlið...verst að það er þegar búið að selja Liverpool!